اشوکت یمته

اشوكت يمته وهم نشوف اعيونهم…
……
مرن اسنين وبعدهن
شفن ويردن حلمهن….
ذبلن اشفاف العشگ
واشتاگن وناغن سمار اليل
ياليل المشيت اوياك ردنه
خل نرد نغفه ابكترهم….
ردني
خليني مشط واسنون عاي
ردني گصبة انصاغت ابچويات ناي…
انباعت وبياع غفله ومر سلفهم…
واشتهت سمرتهم اتگلب سماري
ولاعبني اچفوف اديها
ابنيه بيضه
ومرنفسها
ودغدغ اجروحي ولچمها
ودث لماها وشافته ايلوگ العرسهم……
…
ردني شذرة
انشمرت ابزنبيل دلال الگلايد
وصاح صايغ
كلشي بايع
هلبت الله ويشتروني
هلبت الله اتلوگ شذرات الودايع
يم نگشهم……
دعتنيهم…
هايليل المار مرني وردني يمهم…..
ردني ديمة فيض زخت يم نزلهم…..
گطرة لولحني الوردهم…
يمكن ايمرون وايغرهم بريج وخرز گطرات النده….
ويمكن انچلب نداوه ابثوبهم هيده ابهده….
…. ردني…
كحله اندگت ابهاون جعيده
وانطريت الشوف يجله
لو تمر بجروفه كحله
يحله وايشوف اليريده
يمكن ابمرود دلال ابهيده وايلاعب رمشهم….
ردني طيف وحاير ابين الليالي
امهذب ابعفه وصبر….
ردني گالو كلها چذابه وصدگ طيف الفجر…..
هلبت الله
وبس نزور اعيونهم……..
………..
شايع ابو ياسين السيلاوي…….