المعذره منك
الشاعر: الشاعرة ام حیدر النصاري الفئه: حسینیّات, ولائیات,(المعذره منك)
المعذره منك يقائد، ابحبها غَشمتني
الدنيّه وبيّه لعبت جوله،
وذبني الدهر ♡
وچني غرگان ابذنوبي والعُمر،
يمشي يّتراكض، يشبه
اسحاب المطَر ♡
وأنت يومك، لچمه لچمه وبيك
گاضي، وتحسب الساعة
ظهورك ياشهر ♡
وبعد ادري گلبك المجروح ينزف،
نوبه للكسرو ضلعها، ونوبه
للحره انشطر ♡
اشلون اواسي اسنين عمرك، خلصن
ابدمعه اعله دمعه، وتدعي هم
يگضي السفر ♡
وآنه بالساني اندعيلك، لكن اعمالي
الي تمنع، بيني وبينك مسافه،
حاجز أبگد البحر ♡
يالله يالحجه تعال، وكل وكت اندب
واصيحن، وماكو نيّه الصافيه
التعمي الغدر ♡
يابوشامه السوده ابخدك تلالي،
يمن فدوه اتروح روحي،
الك يا وجه الگمر ♡
گمت اتخيّل ظهورك، تملأ الدنيه
ابعداله، وأنت سلطان
الخلايق والبشر ♡
وگمت اتخيّل مضيفك، بيه جالس،
والأحبه چنها ملتمه يقائد،
وانت تتكلم دُرَر ♡
وچني اتخيّل گهوتك، تطبخ ابعزة
كرامه، والتغار المايخلص
زاده والجايع فطر ♡
يالله ماگولن تعال، وبين كل ساعه و
اصيحن، لازم ازرع زينه
أبگد الشجر ♡
آنه لو مشتاگ اشوفك، والعشق
يچوي ابدليلي، كون اودر
مثل يعگوب النظر ♡
ادري أنت ابغيرتك، تظهر ياسلطان
الروافض، احنه شدينه حزمنه
انتاني من عندك خبر ♡
أم حيدر مكي النصاري
الجمعة – ١٥ شعبان ١٤٤٣