امناطر اطیوفک
الشاعر: ألشاعر شایع ألسیلاوي الفئه: اجتماعیات, وجدانیات,وامناطر اطيوفك تمر…..
…
ابليل وحشه اوي الفجر
گالو عجل لازم سفر…..
مامش هدم… بس الجرح مامش عذر…..
ردت اوگف انودع الارض
ردت انه اشم ابكل كتر….
ردت احظن اتراب الدار
يل چنه عندچ خطار…
گالولي لا
يوصل خبر
وايعطلونه امن السفر
اتمنيت يوگف هل سفر
بس ما وگف ريل الحزن طول العمر……
وامشينه رافگنه اليل
نتلافت ومامش صوت
بس الحنين المنستر
حدر الهدم يسعر جمر…..
اشگد وكحه عينك يا خلگ هل الدمع
كفن اسنين المستحه وراحن هدر…..
وهديت زيج المستحه
وهد الدمع
ذاب الجفن مثل الشمع من كل كتر…..
خل تذبل اشفاف العشگ
واطيوفنه اتموت الفجر….
خل تبچي عيني الما بچت طول الدهر…..
ماتت اسنيني اليافعه ياما عبق بيها الورد فوح عطر….
…وانكرنه ودك يا نهر
وانكرنه مايك يانهر….
وطمينه گمرة امن السهر
اشگد فاض بينه امنل النده ابوكت السحر…..
….
..ونادينه خيال اليل
بلله اعله هونك ياليل
ريض نشم ريحة هيل
ريض دريض ياليل
…
ثاريني يم دارك امر
ثاريني يم حيكم وگف بيه الممر….
شهگت بواچي اتلملمت
ويه النفس جوة السدر….
خنگتي شهگه من الألم
شهگة حزن حد النحر….
…وفاض الدمع….
فاض الدمع من كل كتر….
ولن الدمع مثل المطر….
ردت اشمر ابروحي شمر
ردت انثر ابروحي نثر
ويه السواني الما نست في الشجر…
ويه الدروب العاشرت في الگصب وكت العصر….
عفتك يماي الما رويته اشگد عشگته امنل الزغر….
چنت اوگف اگبالك طفل
اخجل واذوب المستحه ويمك شبر…..
يامه حچينه ويه الگمر
ويه الشجر ويه النهر…
چنت ابسوالفنه المضن
خايف علينه امن الوكت ذاك اليمر…..
تدري انه اموت امن اليل
توحش علي وكت اليل
اشتاگ يل وجهك بدر….
وداعت هواك الما حچيته وما عبر ظل بلنفس….
لساعه روحي امعلگه اويكتار ترچية عرس…..
يامه حچت بينه الناس
گالولي گالولك علي
عشگك هذاك انته الامس….
…..
…تدري انه ناذرلك نذر
لو مرة اشوفك يا ورد
افرش على ادروبك عمر
تسحگ واگولن اي نذر…..
اتمنيت اشوفك وانشتل
اي واشتعل مثل اليمر….
واترشني بكتار الزعل عتبك مطر……
وترد ليالينه المضت مثل الگبل
يل عودتني اعله السهر….
وانثر على ازلوفك عطر
واغفه اويه ليلك ياشعر
حد الظهر….
….
تعذرني يل مامش خبر
ديمه يروحي الما روت
واتناطر اغيومك تمر….
….ياريت…..
بس راح العمر……مر العمر….
واليل وحشه ومن امس مامش فجر……
…..
…..شايع ابو ياسين السيلاوي….