بلا عنوان

«بلا عنوان»

ماريد انذكر خل ينطمس ذكراي

بين الناس ياهي الناس

ناس اللي ابحياتي خاصمت ملگاي

ماكو احساس

عود امن اندفن يفزع جفن بچّاي

شلّي ابهاي

أريدن كون ينسوني

أريد اندفن بكتاب الأدب لا حتّىٰ يقروني

نعم خلني أضيع ابكشخة الديوان

من دون اسم لا عنوان

ولا أهل الجهل بالجهل يحچوني

ما يقراني بس اللي ايعرف يقره

بس الوادم الوَقره

واللي اتلمّه مَتطشره

إحنه ابمجتمع ما يدري شنهي اكتاب

ثقافه امن الشوارع جاب

عنده الهوسه أفضل من حچي الألباب

شنهي الفايده ايخلّدني هذا الجيل

أوْ يذكرني بالتبجيل

بين القال ويّه القيل

إذا ينسوني أنوار الإجوا من صلب إسماعيل

كون انّوب اصيح الويل

شنهي الناس تذكرني

الأصل مو إسمي دايم بالمحافل ذاع

ولَو صيتي ابمدحهم شاع

حچيهم بالحشر ما ظن يعبّرني

خل ينسون

ذرّه وخل ينسفوني ابهواء الكون

بين الأنبياء اشكثر ينذكرون

ميّه وأربعه وعشرين الِف مصيون

ما نعرف أقل من نص رُبعها اشلون

خل ينسون

ما راح اترك الدنياي من دنياي

أرد آخذها كلها اوياي

ماريد انذكر خل ينطمس ذكراي

✍ منصور العرادي

٢٧ جمادي الأول عام ١٤٤٣ هـ ق

١٤٠٠/١٠/١١ هـ ش

٢٠٢٢/١/١ ميلادي