بیت الخیر
الشاعر: الشاعر والرادود ملا فاضل الثوامري الفئه: وجدانیات,بيت الخير
وآنه ازغير وامكحّل اسوالف خير
وافنون السوالف بيها صرت اچبير
جدّي احساب تاريخ الحمل آثار
يروي امن التجارب باْجمل التعبير
عمدان الثقافه ابطابع المريود
ينشر والمناهل من عطائه اتحير
وآنه ازغير واسمع جدّي چنّه ايگول
چلمه ابحكمه لالا مو حچي وتسطير
گلّي الناس ياجدّي الشرف تهواه
واتعامِل شريف الاصل دون الغير
والناس الأمين اتحب تعيش اوياه
وتختار الوفي وابخط هواه اتسير
ياجدّي وكريم النفس ما ذل يوم
وكت العازه مايحتاج ابد تبرير
جدّي وبيت طين اهلك يشرف ابيوت
لو بي هالخصال وحايز التقدير
وآنه ازغير واسمع چلمه چلمه اتفيض
من جوهر وجوده ويحله هالتصوير
واستنسِخ كلامه ابطابعة الافكار
مرسوخه القضيه ابسابقه وتحظير
ميّت جدّي وآنه اليوم احس چلمات
قدّمهن تجاره وبيها ربحي ايصير
وآنه اكبرت واعرفت الحچي ومعناه
واعرفت القصد علّمني وآنه ازغير
چلمه المن زغر منقوشه وسط احجار
ثابت هالنقش ما غيّره التغيير
وجدّي من زغير ايطعّم الچلمات
زقهن زق مثل زق الفرخ من طير
وچنّه من غرسهن يأمل الهاليوم
ناتجهن ثمر بي يحتوي التكثير
ياجدّي المواعظ فاقت التقدير
ياتقدير يجزي ابكلمه يا تحرير
يامن خلّديت ابذكرك الإحسان
ياشمعة وفاء البالعقول اتنير
جمّعت المحبه وألفة اهل البيت
وانت المخلص المايعرف التزوير
بيتك بالحنان امن اوّل المشوار
من ساسه ابتده وماحاجه للتعمير
وبيت الطين ياجدّي البنيته ابشوگ
حتّىٰ وبعد موتك يظل بيت الخير
27جمادي الآخر1443
🖋️فاضل الثوامري