حدر المطر
الشاعر: ألشاعر منصور ألعرادي الفئه: فکاهیات,«حدر المطر»
حدر المطر حظّي اشتعل
**
رايح دوامي اعله الوعد
لنّ المطر ليّه استعد
غيث وبريج اويه الرّعد
من وين ما أنظر بلل
حدر المطر حظّي اشتعل
**
سرويس ماكو للأسف
لن صوتي عالتكسي هتف
هم زين فد خيّر وگف
ناگع يصعّدني قبل
حدر المطر حظّي اشتعل
**
عاد الشوارع مهزله
حالتنه حاله امبهذله
كل ساع ونگره امعدّله
ابلا راعي ديرتنه وحلل
حدر المطر حظّي اشتعل
**
هيچ المطر مَتصَوَّرِت
مو عالدوام اتأخَّرِت
بالتكسي هم آنه حرِت
ينتِل ، مَعا گلبي انّتَل
حدر المطر حظّي اشتعل
**
البندر طريقه اشمبعده
والمطر ربّك زوّده
المتكار ألله ايساعده
بالخير للبندر وصَل
حدر المطر حظّي اشتعل
**
نزليت وصبّتها عدل
وين انطي وَجهي واستضِل
ما صَح مثل وضعي مثِل
لا شك صرت مضرب مثَل
حدر المطر حظّي اشتعل
**
بالباب گد ساعه وربُع
چفّ المطر يصفع صفع
فد لحظه ما خفّ الوضع
حتّىٰ اگدر اوصل للمحل
حدر المطر حظّي اشتعل
**
بس خفّت اشويّه السمه
خاطبت نفسي ابهمهمه
خل أطب سوح الملحمه
ولن عارف اعليّه اتّصل
حدر المطر حظّي اشتعل
**
منصور ها وين اوصَلِت
بالباب ساعه ونص گلت
يا خويه والله اتبلّلت
گلّالي خوش وچن زعل
حدر المطر حظّي اشتعل
**
لفلفت نفسي ابمدرعي
حتّىٰ اجِد بدروب السعي
هم زين ما چنتوا معي
گلّتلي كض روحك عيَل
حدر المطر حظّي اشتعل
**
أمشي وأخبّط بالنگَر
چن گاعد امشيلي ابنهر
كل ساعه يزداد المطر
وما فادني درب العجَل
حدر المطر حظّي اشتعل
**
من راسي لجدامي انگعِت
النظّاره بيها اتلوّعت
نزعيتها ودربي اتبعِت
اوصل وانا ابهذا الأمل
حدر المطر حظّي اشتعل
**
ابطلعان روح اتعلعِلي
ابصوت استغاثة يا علي
وصليت وضيم اتبِلِّلي
خلّاني سابح بالوَحل
حدر المطر حظّي اشتعل
**
✍🏻 منصور العرادي
٢٨ جمادي الأول عام ١٤٤٣ هـ ق
١٤٠٠/١٠/١٢ هـ ش
٢٠٢٢/١/٢ ميلادي