خل العسل

(خلّ العسل)

اليحچي بگفاك بوجهك يچذِّب
لا تسئل حكيم و اسئل مجرِّب

مـو بورود جـــولك يا نهر الضيوف
شصّ بـــچفوفهم وبمايك! معزِّب ؟؟

و يبن آدم الطامع مايجيك بسيف!
يــكشخ بالعلف و يدرعم اليِحلِب!

احـمر لونهم لا تــنخدع باللون
مضموم السواد بحُمرة المُغرِب

و لايــــغـشّك الماي البيدهم شفّاف
صح صافي و لاكن حَيّه جوّا الـحِـب

و هاذه الي يمدحك بالوجه چذّاب
لــو يـــــوم اعـله جارك يمّك يعيِّب

غربِلهم انصحك و اعزل المسموم
الخَلّ بالــــــعسل لاتِخلِطه ايخرِّب

بدر بوجوههم مـثل الگمر علماي
تــــمساح بـگمرهم حلگه متأهِّب

جرحوني جرح لو يوسف المجروح
وي يعگوب يرمي اخوانه جوّا الجِب

من ينسمع صوت اوجاعي يرتاحون
مثل بــيرق و بــيّـه العاصفة تهبهب

جبت اسنيني ارجف و القهر بگفاي
وَتَر عود اعله كيفه يـهزني المُطرِب

غشيم و امّنت بچفوف چم لاعوب
كُره انهدّيت تــالي و انطر المضرب

بيهم من لذت طلعولي كـومه گشور
او عـ لّلِب دوّرت، بي دود شفت اللِّب…

شايلهم بگلبي و طحت نصّ الچول
علــــــي شالو گلب سلّاب من يسلِب

مو شايب و لكن عندي عُمر الشيب
مـــثل شيبه و ترافق وجه المشيِّب

مثل طاسة الماي و للعطش مــخلوق
فارغ، مـنترس، عمري انگضه محدِّب

و مو كلمن صبر عل عيله يعني اضعيف
كُــفر بآمون و تالي و داسه آمون حوتب

#الادب_الاهوازي
#هادي_الفاطمي
#جمهورية_ايران_الاسلامية