ساحة البوگ

ساحة البوگ

گوم اعله طولك فصّل احچاية ربِـح
من طولك اكثر لا تســولف تــنفلگ

تعبانه روح المشتكىٰ اعله الماصدَگ
و السانه يم اهل الچذب يلبگ لبگ

هاك اخذ أموالي و تصَرّف لو تحب
هاك اخذ روحي و بيها طير ابكل خِلِگ

بس لا تهد نفسك لعد روح القلم
جاي اعله تاريخي تمد ايد السَرگ

صفصاف طولك ترجمة خالي الثمر
من وين جاي اتگول انا امحمّل نبگ

ريشة وجودك خفّـفت حتىٰ الحچي
و ابلا رطب ما تثـگل اوزان الـعِثگ

فتحيت عيني اعله المزارع و النخل
معقوله ما ادري الحَشَف ما هو دبگ

معقوله يعني الغَرَب يتساگط عنب
واحنه اعله هاذ المستوىٰ انحمّل صدگ

حتّى الخجل صابه الخجل من حيرته
والباگ شعري ابگصته كلشي محترگ

لا عيب لا زحمه ولا فشله و خجل
خلّله جفن المستحىٰ ايظل منطبگ

آثار غيره ابچذبة اشفافه اكشخن
يغرگ ابعيبه اليجهل ابحور الغمگ

ساحة البوگ امصرفنه ابكل حي ردِن
بس من يضيگ الثوب حتماً ينفتگ
:::::::::::::::::::::::::::::::::::::::::
تمّت ربيع الثاني ١٤٤٣
بقلم محمد حسن ألعرادي