صم اتراب

….. صم اتراب….
…
من شف الوكت شوچني صم اتراب..
تطش بيه العواصف بين تل وتل…..
تطشرت ودبيت ابراگ المهفتات….
اطاوع للذواري والوزن مختل…..
يلمعدل
دلمني ابراگ المدهلات
دلمني وخل ارد يل دومك امعدل…..
دلمني ابدهلتك يا شوگ المعطشات
اطش بين السواجي وهرش المشتل….
اصيح افيش حدر اجدام الحديثات
الك مبخوت فدوة الجدمك امحلل….
وادب ويه الغصن لگشور المنويات….
ولاجي الگيض شجرة ابفيها المخزل….
دلمني اويه البيادر سنبل وچلمات
ابحضن شملات اهلنه الخيطها امهزل…..
دصوغ اتراب وجهي ابين الحچايات
احب چلمات ادور ابحلگ المعسل….
يلمعدل دفرني ابمغزل الحسبات….
احب دورة هواك ابفرة المغزل…..
واحبك من تلمني وتزهگ وتزعل
واحبك من تطشني ابشوگك اتعلعل…
يموجه ابشاطي عطشان وهرش ذبل
نشف ريع الشواطي وهتم وهدل….
وانه امتاني حلم اخضر
يلملي الباث والمعول….
حلم منجل وسط عنبر
محل شف زنجر المنجل…
حلم خيال شگرة اويه الفجر يوصل….
حلم برماد موگد يحلم امبلل…
دلمني ابطين المبلل…
وارد اتلملم ابكتر الكبر وانحل…
واچلب من يمر طاريك
هاي اسنين انه امتانيك…
نثرت اعيون بدروبك يل المنتل….
يلمعدل
خذاني الهيف بدروب الحوافر والدرب طول….
وارد اردود صم اتراب
وارد اردود واتخزل…
….
…..
…. شايع ابو ياسين السيلاوي…