كربلاء الدّم

كربلاء الدّم

ياكربله ابذكر حسين حزتي الفخر
من سالت اعليچ ادموم خلّت أثـر
………
ياكربلا ابــذكر حسين هــالمفخره
انتي ارتفعتي من طاح فوگ الثره
دمّــه الّـي روّه الاجـيال لـمّن جره
وانعكست ابكل هالكون هاي الصور
……….
هاي الصور والمضمون ظل منعرف
زاخر عطائچ خنياب من ينغرف
واليگصد وطگه العوز ما ينصرف
بچفوف ابوالغيره اتزيح كل القهر
………
بچفوف ابوالغيره اهناك حل مشكله
ليث الكمي وفاتح باع لليسأله
وحسين ايلبي الزوار من كربله
والاكبر ايوزع خير مثل المطر
……….
چن جاسم ودمه ايفور من منحره
هالواگف ابهمه اهنا ايعدّل سره
نشمي وغيور وكرار چن حيدره
لمن يطب للميدان منه عُمَر
……….
ياكربلا ابدم الفاض نلتي الاجر
آه والف حسرة آه من هالظهر
ياچم قرن فات وراح بس ننتظر
يوصل لعد اخذ الثار للمنتظر
………

22جمادي الآخر1443

🖋️فاضل الثوامري