مجرم عفيف
الشاعر: الشاعر والرادود ملا فاضل الثوامري الفئه: اجتماعیات, وجدانیات,مجرم عفيف
ياشريف الدنيا ضاگت ياشريف
ابناس ما ميّزت صيف امن الخريف
صارت المحكمه وبالتهمه اسجنوك
وانت ذنبك چ عشت سالم،نظيف
ومن تحت نظارته القاضي عليك
عــاين ويحكم حكم جدّاً سخيف
«مااملوّث»!!!منته من كوكبنه هذا؟
شو اشثگلك ليش ماصاير خفيف؟
ليش منته امشارك ابساحة نزاع
ليش ما عندك للمنازع مضيف؟
ليش ماتحمل شُئب يبن الحلال؟
ليش ما متحالف وصاير حليف؟
ياشريف! ابشرف ماتمشي الامور
كون ارض والعرض تسرقها وتضيف
كون تذبح!!! تشرب ابدم أبرياء
كون تتنگب وتلبس شي مخيف
كون ماترحم تسوّي اشماتريد
كون من كل شي تعبّي ابهالشليف
ياشريف ابّحر الاسود وابظلام
جاي عكس الماي واتجدّف جديف!!!
اهواي گبلك حاكمتهم مادريت
نزف دمهم من حكم قلمي نزيف
هالنصيحه امقدّمه ابمكتب قضاء
والقضاء اوياك يتعامل لطيف
لواتعوف الشرف نكتب لك برئ
واحنه غير التبرئه شي ما نضيف
ولو اتعاند يصدر ابحكمك قرار
والقرار امأيّد ابشدّه وعنيف
شنهو ردّك نستمع لآخر كلام!!!
وانت ماتنطق«سكوتك شي يخيف»!!!
وابسكوتك هدّمت كل هالكيان
والخطاء بالصّح عدلته اشگد ظريف
وصاح قاضي المحكمه وصار انتباه
يعلن ابحكم وحكم جداً شنيف
گال حكم المحكمه «ايموت الشريف»!!!
خاطر ايعيش الذي اصله شنيف
وصفّگ الجمهور وايأيّد قرار
صِدَر من ديباج منحط عالكنيف
و سادة اهل الخير لازم ينتفون
من قلم سيّئ يخط «خادم وصيف»
والملف من دوّنوا كتبوا عليه
هالملف يختص بسم «مجرم عفيف»
🖋️فاضل الثوامري