واهس شعر

واهس شعر

گالولي صوغ امن الحچي واشما تصوغ انرغبه
من كل بحر من كل وزن نشريلك اشما اتكتبه
وآنه اعرف الهم بالحچي واشما حچولي امجربه
گلتلهم ابوزن الشعر شنحط وزن وانحسبه
وزن القوافي اشما ثگل يزداد خوف ورهبه
والقلم شلال الچلم يشبه سهم لو حربه
والشاعر اسلاحه الشعر ميدانه منّ ايچهبه
ومايقبل ابحچي الرخي وماقبل چلمه امحدبه
كون ابقوافي امبشّطه ويعرف اصول اللعبه
وخيط الحچي لازم قوي وحتى الخيال ايسحبه
ابميدان قافية الشعر لا ينهزم بالصعبه
وايقفي ويه القافيه مو يغفه وكت السربه
حلوه الحچايه امّولحه من تنّكت وامتربه
اتخليها جوهر عالورگ والورگ منها اتشربه
هيچ وصغت حچي ابحچي ايدلّي للتايه دربه
وخلّيت واهس للقلم گلت آنه اعيش ابگربه
اي ولو تعّبت القلم چن گمت احس ابتعبه
ياقلمي لا اتچلّ الجدم وابوَسَن لا اتحس هدبه
يالصرت ناموس الشعر والشعر يمك عتبه
لو نمت نوّمت الحچي «الوجداني» چا شو ذنبه
و«شعبي» الّي منك يرتجي تحچيله توگف جنبه
و«اتقرّض» ابقرضك درر و امن العطاء اتوهبه
ياقلمي ياواهس شعر يالحايز اعظم رتبه
عنوانك ايخلّد ذكر لمّن يمجّد شعبه
تاره اليسكّن خاطره وتاره اليصيح ايندبه
تاره اليطفي النايره وتاره اليشنّ الحربه
ياقلم شعري ابواهسك حققت كل هالطلبه
خلّيك واعي ولا تذل حچي الشرف بس كتبه
وابوعيك انجاز الشعر كهربه وصوبك جذبه

19 جمادي الاخر1443

🖋️فاضل الثوامري