چلمة بخت
الشاعر: الشاعر والرادود ملا فاضل الثوامري الفئه: اجتماعیات,چلمة بخت
ياچلمة بخت من تنحچي ابديوان
تتصدرالگعده لو حچتها احلوگ
ابناس البالبخت تمشي وتطلع احگوگ
واتخلي ابرگب من عانداها الطّوگ
لو تنطق توزّع خير بالمعروف
لن تحچي ابكلام الگبله مامسبوگ
چلمة بخت لهل البخت من تنساق
تطفي النايره واتعوّض المحروگ
وديوان الّي ماينفتح لهل العوز
وللحاجات بابه دايماً مطبوگ
واچفوفه ابعطاهن ماهن امعلمات
ومن شهد الحگوگ اشفايفه متضوگ
شارة بخته ما يثبت معاها انجاز
لنها امچعّمه وبيها الفشل مطروگ
ديوان الشرف اخذ وعطا ومعروف
للتايه يدلّي وللحگوگ ايسوگ
ومن خيرات بخته امحمّلات انياگ
وماتگدر تعلّي امحدّبات النوگ
هذي اهيه الدواوين ابّخت تنصاغ
واصياغ البخت چن عاشگ ومعشوگ
ياما بالدواوين اسحگوها ابخوت
وابچلمة بطل صار الشرف مسروگ
وياما بالدواوين الشريف ايموت
والطبعه ردي امحلق صفه ومعتوگ
وياما بالدواوين اليسر يحتار
وامن اهل العسر هاليسر ظل مخنوگ
ياچلمة بخت كلمن حياچ ايعيش
يبگه اسراج بالظلمه وضوا معلوگ
والما بي بخت كل ما يعيش ايموت
والمنشگ تره اشما خيّطوه مشگوگ
18 جمادي الآخر1443
🖋️ فاضل الثوامري