چلّة الخرسة

«چِلّة الخَرسة»

** ** **

مَثَل معروف عدنه وعاللسن مطبوع
والحَچّايه عدهم دوم يتردّد

(كلمن يمد رجلينه اعله گدّ اغطاه)
وآنه ادري المَثَل مضمونه بي مقصد

لچن من ظاهره راوَدني إستفهام
هالماله غطا رجله يمدها اشگد..؟!

يتكرفص لزوم ابقسوَة اجويريد
من كثر البرد رجلينه ما تمتد

البعض مدّوا رِجِل لِلّا نهائيّات
وغِطاهم طوله راهي وماله گدّ وحَد

صَح هُمّا ابدَفو بس ماله طعم وذوق
الٱبيض يِنجِهِل لو ما يجي الأسوَد

بالأضداد گالوا تُعرف الأشياء
تِحِس طعم الدفاوَه اشوكت ما تبرد

وأكو ناس ابسماء الباري متغطّين
چاسيهم جِلِدهم والوضع أجلد

شنو ابچلّة الخرسه صوتهم مسموع..!؟
وغِده ايگصّ ابعظمهم مو ثلج، مُبرد

يموت المحترگ صوته يصيح الآه
لچن سكته يموت الدمّه يتجمّد

✍🏻 منصور العرادي
١٩ جمادي الأول لعام ١٤٤٣ هـ ق
١٤٠٠/١٠/٣ هـ ش