گهوة و تتن
الشاعر: ألشاعر شایع ألسیلاوي الفئه: اجتماعیات,گهوة وتتن…
ووجاغ ما يخمد ضوة…
محماس وابنار استوة..
عيت يروحي وما تبي اتشم الهوة….
مشتاگ ياعطر النفس ريح اگهوة….
واتلاعب اگليبي ابشجن…
گهوة وتتن….
.
من تهب نسمات العصر
تتراگص اعواد الكبر تجدح ضي….
والعود الاخضر يشتعل
يلهب كتر
بس من كتر دمع مي….
غيمن دخان ونده
شدن عبي وصاغن في…
ناغن كراكيش اصهوة…
دثن عبق ريح اگهوة…
واربوع دلالي انتشن…
گهوة وتتن…..
.
حن الگلب يسمع طرب موال بوذيه اعتاب…
لا والمضن كلهن مشن
عيه وخذت صم اتراب….
.
ياعود هم ترجع بعد ذيچ المواسم ياعود….
مطرب لچن طور ابحزن لاعب اوتارك يا عود….
حورب ظعنهم مايرد بطل ونينك ياعود….
فات العمر فرحة عرس سمرةوتحن للچلاب…
شيب انترس زلفي وضوة…
واعيوني چلن مولحن…
گهوة وتتن….
.
من الصبه وعودي انتشه امعلم يشم ريحة هيل….
شمت هطر عود الگصب من ينتشع وكت اليل….
لو فوح الگمگم سعد
ديمه ونشع بيها الورد
چن روحي تصعد ماترد
خلخال گرگع لو دوة…
وهاون يرن…
گهوة وتتن….
.
گهوة وتتن
خاون انفاسي امن الزغر نامن ينومة عافيه….
ما فارگني امن الصبه ونيات كلش صافيه…..
ميلن يرفجات العمر…
صيهود بيچن مايمر…
يخشوف مرتعچن نوة….
ودلة الغصن….
گهوة وتتن….
** ** **
. ابو ياسين السيلاوي…. 🌷🌷
الله الله
موسيقة شعريّه
وحدة موضوع
ايقاع الباطني ايخبّل
مفردات ريفيّه جت في النصوص اعطت للجمال النَص جمال مضاعف
انسياق شفّاف لكن فنّي بين الأشطر و التحوّل من تفعيله الا تفعيلة اخرى و هالشي يترجم مهارة الشاعر حينما يكتب القصيدة المفتوحة يعرف كيف يستخدم التفعيلات في التغيير لكن بحفظ الجرس الداخلي للنص
قصيدة روعه يا استاذ شايع السيلاوي المحترم
دام قلمك الجميل👌🏻🌹