كاروكي
الشاعر: ألشاعر شایع ألسیلاوي الفئه: اجتماعیات, وجدانیات,كاروكي
خرخاشة…ولعابي ازغار واحروزه…
سبحة امكركشة وخرزات من طاري العتيج وخيط…
مشدودة اعله كاروكي…
وكتر من طارف الشكوة…
ودللولت عصاري وخضت احبيبات
وامناوب تعب وامعاتت ونخوة…
وحزم خوص ومناجل ظيم حت اسنونها البردي…
وتوالي اليل هدوة سلف ملچوم وجرح يدي….
وتعب امي
ونعاويها ابحزن من تلزم الرحة…
النجم يبچي اعله طاريهن
يشد خلگه اويتاليهن لحد ما ينكشف صبحه…
ويهل دمع الشته ابسكتة ويفز من ألالم جرحه….
ويتاني الگيض مر خيال رش فوگ الجرح ملحه….
وبعدها امي ونعاويها مثل طير انكسر جنحه….
وربن وياي
كل چلمة الحچتها ابأذني ترچية…
وتبديت ابحزن كاروكي ليلية…
وفرشت اشواي من حزني حدر ضلعي كفاني وصار زولية…
وتغطيت ابحنين الگاع للگطرة غطاني وصار مزوية….
وكبرت انه وكبر همي وبعد بيه….
دمع ذاك الطفل لأمة ابحزن من يبچي عصرية…
وبعدني ابحاجة المحتاج حنية…
وبعدني احتاج خرخاشة وبعدني احتاج لولية….
….
….ابو ياسين السيلاوي….